ماذا حدث للمصريين !!

فى كتاب بعنوان (ماذا حدث للمصريين؟: تطور المجتمع المصري في نصف قرن 1945 - 1995

للأستاذ/ جلال أمين 

مبدئيا مش هعلق على الكوفر.

ثانيا بالنسبة للمضمون فالأستاذ بيتكلم عن التحور اللى حصل فى مصر طبقيا وأسبابه بتفنيدها وبحثها.

وطبعا الأستاذ زى مامذكور على العنكبوتية إنه أستاذ إقتصاد ومتهيألى عشان يكتب كتاب زى ده أو بحث كان محتاج مساندة أستاذ علم إجتماع.

الكتاب زى ما الأستاذ بيقول دى الطبعة الرابعة يعنى حوالى نص مليون نسخة نزلوا السوق.

الرايتنجس بتاعته على Goodreads 1752 والرانك 3.94

 

صراحة مش فاهم إزاى.

أولا وجهة النظر اللى فى الكتاب كانت عندى من وأنا فى تانية ثانوى يعنى دى باينة لعين الشخص متوسط الذكاء.

 ثانيا: الدكتور بيتكلم كلام عشوائي من غير إحصائيات.

ثالثا: بيتكلم عن ثقة كبيرة من غير مايذكر ولا مرة إن المفروض دى تبقي وجهة نظر(بالرغم من الهري الكتير اللى مذكور فى الكتاب -المثقفين ضمير الأمة ياسيد-).

رابعا: الكتاب ذات نفسه.

* الأستاذ معول كتير قوي اللى بيحصل على الحراك الطبقي وإنتقال كتير من الطبقات الدنيا للمتوسطة ومن المتوسطة للغنية وعن محدثين النعمة والفلوس لما جريت فى إيدهم وبتاع بنظرة حقد شديدة باينه قوى فى كلامه عن ذوى الأملاك والأغنياء.

جميل الكلام ده وأكاد أكون متفق معاك 90% بس الكلام ده نقوله على قهوة وإحنا قاعدين بنحكي مش فى كتاب المفروض إنه هيوصل لإيد ناس كتير ,الحراك ده برضه نتيجة مش سبب فين السبب ؟ طب فين الحل ؟ 

 

*باين جدا تحامل الأستاذ على السادات وإنه هو السبب فى اللى إحنا فيه لحد إنهارده (وقبل مايجي كمان 999) وإن الإنفتاح هو السبب برضه من غير أى أبحاث أو حتى إستشهاد برأي واحد بس من علماء الإجتماع.

 

*التليفزيون ,الأستاذ برضه بيتسني أى وضع عشان يكيل للتليفزيون وإن إحنا كان زماننا بنحكم العالم لولا إن التليفزيون دخل مصر.

 

*الحجاب ,الأستاذ تعرض للحجاب مرتين فى كتابه أول مرة فى عرض من الحراك الإجتماعى إبتدى ظهور المتشددين وإنتشار الحجاب وإن الحجاب دليل علي تخلف الأمة رجع بعدها فى فصل مخصص عن الحجاب وكان بيضربلنا الأمثال فذكر والدته وإنها محجبة من قبل 52 وإن الحجاب دلالة على العفة (أه والله زى مابقولكم إقروا الكتاب حتى).

 

*الهجرة ,الأستاذ ذكر إنمن أسباب الحراك الإجتماعى الهجرة لدول النفط مع ذكر إحصائيات بمعدلات التغير بتاعتها ,ودليله على كده كان عيلته شاف أبوه وإعمامه كام واحد مفيش ولا واحد سافر قبل الثورة وحسب دلوقتى ولاده وولاد إخواته وشاف كام واحد سافر اواخر التمنينات وحسب حسبته وقال دى إحصائية اللى هاجروا من مصر أه والله.

 

وكتير غير كده.

أنا مش زعلان على الكتاب ياما قريت كلام رخيص وإنت ممكن يكون كلامى اللى بتقراه دلوقتى فى نظرك رخيص بس أسفى على رد فعل الناس عليه